A Raukea e Paulus i Here Lakea ne Pilemon

A Nita Vakalohoka

E Paulus a apostolo i herea ra raukea iea, i here palupu turana ra raukea i here lakea ne huriki a tara ne Kristo o Kolosi. I herea na tahuna i made na bavi.

E Paulus i herea na pida i 30 o 35 muri ne Isu i mate. I vakaru ra raukea nga ne Onesimus rua e Tasisus ru gu bole lakea o Kolosi.

E Paulus i here lakea ne Pilemon, a bakovi o Gris i made o Kolosi. E Paulus i pugaia hosi e Pilemon, i vakalongoa na velenga kamumu (ves 19). E Pilemon i luhoi torea e Kristo, i dili turana tara ne Kristo o Kolosi.

E Paulus i herea a raukea iea, a vuhuna e Pilemon i tahoka tara vora, a rana e Onesimus. I ha na matakari vona, i lakea o Rom. Na vinara ne huriki a Rom, a voravora i ha, a matakari vona bara i rabalakia na tahuna i matavisia. Ra i maea, e Paulus i herea ra raukea iea lakea ne Pilemon, ge nanea nahea ge rata halea e Onesimus, ge bole mulea manga e turana ne Kristo (ves 16).

Philemon

A Mugana Nita

1Iau e Paulus, ni ru dili iau na bavi, a vuhuna a ramai e Isu Kristo. Maria e Timoti, a turane tarua, miri here lakene vomu o Pilemon. Miri ngaru hateka ioe, te leho palupu. 2 ^aMiri here tabu lakea na tara na Vure ri vapopo na ruma vomu, e kurabane hita e Apia, turana e Arkipus i leho turane maria na leho na Vure.

3A Vure e Tamane hita, rua e Isu Kristo a Bakovi Dagi ru gu rata kamumu mua, ru gu habi a nivalemu ne mua.

E Paulus i Vivi, i Vasileki

4Na tahuna a luhoi ioe, a kavurikea a Vure, 5a vuhuna a longo ta o luhoi torea e Isu Kristo, o ngaru hatekea, o ngaru e huriki a tara vona. 6A vasileki vona na tahuna o taki e huriki a niluhoi vomu ne Kristo, bara i vakabele a kanena, ri gi lohoka kamumu vona a maki kamumu lobo si gi bole a vuhuna si rihi e Kristo. 7 ^bO vakasiri manga o ngaru hateka e huriki a tara na Vure, o rata kamumu hateka ria, o vakatora a niluhoi ne ria. Na naro iea kunana, o vakatora a niluhoi nau, o rata iau a vivi.

E Paulus i Nana Vona e Onesimus

8I uka ma a mangenge ni vakuku ioe go rata a naro kamumu tara, a vuhuna tarua varago a viri ne Kristo. 9Pali a vuhuna tu vangaru, a koi ni vakuku ioe. Iau, a gare, a made na bavi, a vuhuna a ramai e Isu Kristo. Lakea a ngaru ni taki kunana ioe. 10 ^cA ngaru go rata kamumua e tugu, e Onesimus. A bele manga e tamana na tahuna a made na bavi. 11Hosi ia a vora tavula, i uka ma i kori kamumu ioe. Pali ngane i tahoka a leho ne tarua. 12Ngane ga rudua, ge hamule lakene vomu. Ia a hategu. 13Bara vivi ge made turagu koea, ge bole a murimu, ge tuhori iau koea na bavi, a made vona a vuhuna a taki tala a Velenga Kamumu. 14Pali a koi ge made koea, i uka ma ga nana taro ioe. Na naro iea, ioe bara o ngaru ge made koea ge kori iau, bara i ramai a ningaru vomu, i uka ma ge ramai a hini ga taki tuhare ioe. 15I uka ma tu palala, ma ge ha taro muga ioe, ge made turagu popote, lakea muri a Vure ge ratea ge hamule, ge made liu turamu. 16 ^dI muga ia a vorakato vomu. Pali ngane ia e turagu, a ngarua. Ngane ia e turamu o ngaru hatekea, i manga e turamu na malala, e turamu ne Bakovi Dagi.

17I mavonga, ioe go luhoi iau, ga manga a viri tu leho palupu, o taguia, o bole mulea e Onesimus, i manga kunana a hini bara o tagui iau. 18Ia ge rata hale muga ioe, o ge panaho ranga moni vomu, o here puru, bara koli. 19Iau, e Paulus, a here na limagu ra ngava iea. Ioe bara o ngaru, bara koli a mapana maki i bole muga. Pali ga ta maea tabu, ioe tara bara o koli a maki tara o bole hosi nau, ra a nimahuri na hanumu. 20I muholi, o turagu. A ngaru go kori iau na rane Bakovi Dagi. O vakatora a niluhoi nau na rane Kristo.

21A lohoka vona bara o longototo. A here lakene vomu, a lohoka vona a naro go rata virihi e Onesimus vona bara i rangi a hini a taki ioe vona. 22 ^eGa taki tabua tara maki. O pelekadoa a roho vomu. A luhoia a Vure bara i longo a nivasileki ne mua, bara lakene, a made turane mua.

E Paulus i Tarulu e Huriki

23 ^fE Epapras i talo mua. I made na bavi turagu, a vuhuna i ramai e Isu Kristo. 24 ^gE Markus, e Aristakus, e Demas, e Lukas, ra ri leho turagu, ria ranga ri talo mua.

25E Isu Kristo a Bakovi Dagi ge rata kamumu mua.